أنا أصلـــى إذن أنا أفعل معجزة !!

قال تعالى:(حافظوا على الصلوات والصلاة الوسطى وقوموا لله قانتين)

قال رسول الله صلى الله عليه وسلم وهو يلفظ انفاسه الأخيرة :(الصلاة الصلاة وما ملكت ايمانكم)

(بين الرجل وبين الكفر ترك الصلاة)

إن أول ما يحاسب به العبد يوم القيامة من عمله صلاته ، فإن صحت فقد افلح وانجح ، وإن فسدت فقد خاب وخسر ، فإن انتقص من فريضته شيئ قال الرب عز وجل : انظروا هل لعبدي من تطوع فيكمل منها ما انتقص من الفريضة ؟ ثم تكون سائر اعماله على هذا

ظاهرة غريبة بقالها فترة طويلة ، إن الناس بقوا يعتبروا الصلاة العادية –صلاة الفروض الخمسة - نهاية المطاف روحانياً و إيمانياً بالنسبة للإنسان و مقياس أساسى لأخلاقه ..

الصلاة ما بقتش حاجة أساسية فى حياتنا ، لا بنراعيها فى مواعيد برامجنا ولا مواعيد محاضراتنا ولا مؤتمراتنا ولا مواعيد الانصراف و الحضور..

و ده وصلنا لإننا بقينا نسمع عبارات من النوع ده عادى جدا:

"ده راجل بيصلى و عارف ربنا"

" بسم الله ماشاء الله عليها بتصلى وعارفة ربنا"

"ده راجل عارف ربنا ما يصحش يعمل كدة"

فى أى مجموعة من أى فئة سواء كانوا شباب نساء أو بنات أو رجال كبار عدد اللى بيصلوا محدود جداً..

يعنى دلوقتى تبقى معجزة من معجزات الزمان ان يكون فى شلة شباب و بينهم اتنين بيصلوا مثلا..
و الاتنين دول- لو وجدوا- بيبقوا هما الشيوخ بتوع الشلة لمجرد انهم بيصلوا فرض ربنا..

نادرا لما يكون فيه بيت اهله كلهم مصلين ، دايما الشاب او البنت الصغيرين او الاطفال بيبقوا مش بيصلوا ، و احيانا كتير احد الوالدين بيبقى او بتبقى مش منتظم فى الصلاة ودى حاجة للاسف بقت منتشرة جداً بصورة محزنة..

المساجد بمساحاتها الواسعة بتبقى فارغة من المصلين أوقات الجماعة ماعدا طبعا يوم الجمعة ورمضان..
و فى ناس مش بيصلوا غير يوم الجمعة أو فى رمضان بس..

اللى بيصلى بيعامل على انه المفروض يبقى انسان تقى نقى منزه عن الاخطاء و أى خطأ يرتكب يبقى مصيبة لو من جانبه ، و ممكن يتفوت لاى حد تانى مش بيصلى..

"انت ازاى يا راجل بتصلى و عارف ربنا و تعمل كدة !!"

طيب بالعقل ،يعنى ايه واحد عارف ربنا و واحد مش عارف !!

مش المفروض ان احنا كلنا عارفين ربنا؟

مش المفروض ان احنا كلنا بنصلى اساسى و دى حاجة مفروغ منها زى الشهادة بأن لا إله إلا الله ،و المفروض ان بداية الطريق انك تصلى عشان تبقى على الاقل مسلم بس و تبقى كدة على اول الطريق مش نهاية الطريق؟

و المفروض كمان لو اعتبرنا المصلى انسان مسلم عادى يبقى مش منزه عن الخطأ ، يبقى بشر بيغلط زيه زي اى واحد تانى..

نفس الكلام ينطبق لو اتكلمنا عن المحجبات او المنتقبات او اى حد بيبقى باين على شكله انه مسلم، زى ما واحد يقول ازاى محجبة و بتسمع اغانى او ازاى منقبة بتتفرج على مسلسلات وازاى و ازاى

اللى عاوزة أقوله إيه؟

المفروض يبقى الخطأ واحد أيا كان فاعله لأن ربنا بيحاسب الانسان على ثوابه أو خطأه مش بمظهره أوغيره

********************

ربنا يهدينى و يهدى سائر المسلمين

:)