مسلسل نور

اليومين دول انتشرت هوجة المسلسلات التركية على التلفزيون العربي (نور ،سنوات الضياع، ويبقى الحب إلى آخره)،زى هوجة المسلسلات المكسيكية من كام سنة برضه..

لمن لا يعلم ،فمسلسل نور يعرض يوميًا على قناة MBC4 وسمعت إنه هيقفل ال100 حلقة بعد أسبوع تقريبًا..

المسلسل ذو الشعبية الكبيرة جداً من المحيط إلى الخليج..
المسلسل اللى خلى اتنين من صحابى يقفلوا معايا التليفون عشان يتابعوا جديده!

أنا جربت أتفرج على مسلسل نور ده بس ما لقيتش فيه حاجة شدتنى قوى للدرجة اللى تخليني أكمل باقي الحلقة، قصة عادية جداً - ده لو كان فى قصة من اساسه- وأحداث عادية برضه..

هو بس البطل أمور شوية :D
بس مش لدرجة إنى أقعد أتفرج عشانه يعنى ، أعتقد إنى عديت المرحلة دى من زمان..
(بالمناسبة ، سمعت إنه كان عارض أزياء للملابس الداخلية)..

وفى رأيى اللى بيتفرجوا على المسلسل و متابعينه من الأنواع دى:

1- بنات بتتفرج عشان الشاب الوسيم الظريف ..

2- شباب بيتفرجوا على المشاهد الساخنة المحشورة فى وسط المسلسل بدون داعى..

3- ناس بتتفرج على المسلسل لاعتقادهم أن العالم كله يشاهد مسلسل نور ولابد أن يساهموا فى إحياء الظاهرة..

لو جينا نفكر فى سبب الشعبية الرهيبة اللى وصل لها مسلسل نور فى الوطن العربي هنلاقى الأسباب متمثلة فى التالى:

1- حرمان نفسى و عاطفى و كبت وفراغ على جميع المستويات و الأعمار..

2- معاملة سيئة من الأزواج لزوجاتهم يشوبها عدم الإحترام و التكبر و الإهانة..

و إهمال من الزوجات فى المقابل إن ما كانتش بترد له الصاع صاعين ..

3- التفكك الأسرى المنتشر فى الدول العربية..

4-غياب الوازع الدينى (وهو ده السبب الرئيسى لكل المصايب اللى بتحصل لنا)..

وبعد كل ده الناس دى ييجوا يتفرجوا على زوج و زوجته بيتعاملوا بمنتهى الرومانسية و الود و الحب و الاحترام ..
زوجها عمال يرقص معاها و يفسحها و يشتريلها فى ورد وهى عمالة تتدلع عليه..
يشوفوا عائلات مترابطة بيحبوا بعض و بينهم ألفة ..
حتى لو اللى بيحصل ده كله مبالغ فيه جدًا و مفتعل
تفتكروا رد الفعل هيكون عامل ازاى؟!

اللى حصل ده متوقع و طبيعى جداً،كنتم مستنيين ايه من شعوب فاضية و مكبوتة ومغيبة زى الشعوب العربية ؟

(وصل الموضوع لحالات طلاق فى بعض الدول العربية مثل السعودية و الأردن و البحرين و غيرهم بسبب المسلسل!)

التعليق على المسلسل:

هو ممكن يكون فى شيء من المبالغة فى المسلسل كعادة الدراما فى توصيل فكرة الرومانسية الأبدية وزرعها فى عقول الناس..
و الفكرة المغلوطة عن الحب اللى بقت فى كل الأغانى و الافلام و المسلسلات و الإعلانات..

بس فيها ايه لو حاولنا نقلدهم يعنى بس زى ما ديننا بيقول؟
فيها ايه لو عاملت زوجتك باحترام تخليها تحترمك غصب عنها؟

لو جبت لزوجتك بوكيه ورد مرة ،هتخسر ايه؟
و فيها ايه لو اتزينتى و اتجملتى لزوجك؟

لو ضحكتى فى وش زوجك مرة بدل البوز اللى ضارباه ليل و نهار؟

أعتقد دى ممكن الحسنة الوحيدة اللى نطلع بيها من المسلسل..

نقدى العام للمسلسل و للظاهرة:

1)القصة عادية جداً كما ذكرت فى السابق و كذلك الاحداث ولا تستحق كل الهوجة دى..

2)نص المسلسل حب وغرام و هيام و علاقات شائنة كمان ، المفروض نفهم إن الحب مش كدة و الرومانسية الأبدية وهم زائف يحاول الإعلام زرعه فى عقولنا..

3)الدنيا فيها حاجات مهمة أكتر من كدة لشغل أوقات الفراغ ، ممكن نتابع مسلسلات وبرامج زى ما احنا عاوزين بس المهم تفيدنا ولو ب1% و ما تبقاش مخالفة لشرعنا و تعاليمنا..

4)نبقى نفتكر كدة و إحنا قاعدين نتفرج على نور نقلب على الجزيرة أو العربية أو الأقصى (فى وقت الفاصل ولا تزعلوا) و نشوف شوية مناظر جثث محروقة و متفحمة و أطفال صغيرين غرقانين فى دمهم ،وستات بتعيط جنب بيوتها المهدودة..

أنا عارفة ان خلاص مابقاش فى حد بيهتم بالكلام ده و بقى عندنا مناعة ضد الصور دى بس لعل و عسى يعنى ،يمكن تحرك فينا حاجة او تفكرنا بالخيبة اللى احنا فيها ..

---------------------------------

يا مسلمون أما نخشى من النِقَـمِ

كم من قتيل هَوَى والغَيْرُ في نَغــمِ

كم من نساء ثكالى عَزَّ مُنجِدُهم

كـم من سبايا وكـم من يُتَّمٍ ودمِ

يا مسلمون أفيقـوا من رقادكم

قبل المثول أمام الله والنــــدمِ