المسلمون في بلاد العم سام: خواطر عن العنصرية

أحد فروع المكتبة العامة في فيلادلفيا يخصص عدد من الساعات للسماح بالأباء المساجين بقراءة الكتب لأطفالهم عن طريق مكالمات الفيديو.. لو لاحظتم الأطفال الأمريكان لابسين ملابس إسلامية.. ده لأن السجون الأمريكية من أكثر الأماكن نشاطًا في التحول إلى الإسلام..
الناس دي بتخرج للمجتمع محتاجة دعم و احتواء بس للأسف نتيجة لفقر الأمريكان الأفارقة و عنصرية الجاليات المسلمة الأنشطة دي ضعيفة و محدودة جدًا..

في إحصائيات بتقول إن واحد من كل خمسة من سكان مدينة فيلادلفيا الأمريكية مسلم، أو يمكن أكتر من كدة.. و أغلبهم طبعًا من الأمريكان الأفارقة اللي المسلمين العرب و الهنود و الباكستانيين بيتعاملوا معاهم معاملة سيئة إلا من رحم الله..

لكن الشهادة لله على المستوى الشخصي في الست سنوات الماضية الناس دي من أكرم و أطيب و أكثر المسلمين اللي تعاملت معهم احترامًا..
و المساجد اللي بتكون 100% أمريكان أفارقة أحسن و أرقى مساجد بدخلها و بتعامل فيها باحترام كسيدة مسلمة من الرجال و النساء على السواء..
و على عكس مساجد الشرق أوسطيين اللي كلها ربات بيوت مش متعلمين بلاقي الأمريكيات الأفارقة المسلمات متعلمين و متفتحين و ليهم كلمة و رأي في كل حاجة بتتعمل في المسجد بمنتهى الأدب و الإحترام برضه من الرجال و في نفس الوقت حريصات على دينهن و بيحاولوا يتعلموا.. الأخوات دول لما بيدخلوا مساجد العرب و الهنود بيتعاملوا بمنتهى قلة الذوق و العنصرية إلا من رحم الله برضه..

تيجي بقى أنتي تروحي عند الفلسطينيين (أغنياء عرب أمريكا) يبصولك من فوق لتحت و ما يردوش عليكي السلام لو أنتي مش فلسطينية زيهم، تروحي عند الباكستانيين و الهنود و البنغال هتلاقيهم بيتعاملوا مع النساء و الأطفال كأنهم قطيع من الغنم ندور لهم على أي أوضة فاضية في بدروم الجامع نحطهم فيها و خلاص عشان الستات يرغوا وقت الصلاة و العيال يلعبوا و يرجعوا على السجاجيد و نريح إحنا دماغنا..

 

(الكلام ده بالمناسبة لا يمكن تعميمه على سائر الولايات المتحدة الأمريكية شديدة الاتساع لأن تجربة المسلمين تختلف و تتباين بشدة في كل جزء من هذا البلد فوجب التنويه إن هذه هي مشاهداتي لعدد ليس قليل في المنطقة التي أقيم فيها حاليًا و سوف أقوم بنشر مشاهداتي لتجارب إيجابية أخرى إن شاء الله)..